عن مارك روثكو

أحب بس أنوه في الأول إن أي هري هقوله هنا ده مجرد رأي شخصي غير متخصص فبعتذر مقدمًا للناس المتخصصة، وأنا مدركة إن حبي لفن روثكو زي حب صرصار للكريم بروليه بالظبط.

أولاً للي ما يعرفش مين مارك روثكو Mark Rothko فهو فنان أمريكي من أصول روسية وبيعتبر من أهم فناني الحركة التعبيرية والرسم التجريدي عامًة. روثكو أتولد سنة 1903. وعاصر الحرب العالمية الأولى والتانية وده أثر بشكل كبير على فنه

روثكو مشهور بلوحاته اللي بتصور مستطيلات بألوان مختلفة بتشكيل أفقي أو رأسي، زي اللوحة دي اللي اسمها Orange, Red, Yellow

Orange, Red, Yellow, Rothko, 1961

لوحاته وقت ما كان بيرسمها ولحد دلوقتي مثيرة للجدل جدًا والناس بتشكك في قيمتها الفنية لأنها بالنسبة لهم مجرد ألوان بتفتقر للخيال والإبداع، بس روثكو كان دايمًا بيشوف الفن عامًة ولوحاته خاصًة على إنه تجربة نفسية عاطفية في المقام الأول، وعلشان كده قال إن فيه ناس كتير أوي بتعرف ترسم بس قليل اللي بيعرف يوصل للناس إحساس معين بالرسمة ويحول الموضوع لتجربة مش مجرد تسلية.

ورثكو فعلاً كان عنده رؤية خاصة ومتفردة جدًا للعالم وده اللي خلى لوحاته شخصية جدًا من ناحية إنها بتعبر عن تجربته هو مع العالم ومن ناحية إنها بتعتمد بشكل أساسي على ترك أثر نفسي في المتلقي (اللي هو ممكن يكون مستعد لاستقبال المشاعر دي أول لأ)..

يعني مثلاً لوحة زي دي Blue and Grey الألوان اللي فيها بسيطة جدًا وتشكيلها من الناحية الهندسية أبسط، ولكن الفكرة إنها بتسيب انطباع نفسي على المتلقي بيعتمد على علاقته الغرائزية بالألوان دي، أو الألوان دي بتثير فيه أي نوع من المشاعر…

Blue and Grey, Rothko, 1962

يعني اللوحة دي بالنسبة لي حزينة ومقبضة جدًا، مش بس علشان اللون الأزرق والرمادي في الوعي الجمعي ألوان الحزن، ولكنها بتمثل لي محاولات يائسة للتعلق بالأمل، وكأن اللون الأبيض والأزرق الناصع بيعافروا علشان ينوروا لكنهم بيتطفوا بلون اللوحة الرمادي.

وعلى الرغم من الآراء المتضاربة في لوحات روثكو إلا أن في أوقات كتير ناس في المعارض بتاعته كانت بتقف قدام لوحات معينة وتعيط، وده بيوضح إن لوحاته فيها شحنة نفسية قوية وإن طبيعي إن لوحاته بتأثر على الناس بشكل مختلف، أو ما بتأثرش خالص!

بشكل شخصي، فيه لوحتين قريبين من قلبي جدًا وواحدة فعلاً خلتني أعيط (غالبًا كنت وقتها emotionally vulnerable بس برضه ).. اللوحة هي Black in Deep Red

Black in Deep Red, Rothko, 1957

اللوحة دي بتوصل لروحي بشكل ما.. أولاً ألوانها دموية جدًا فبتوصلي إحساس بالعنف، congealed violence كده.. ده غير إن علاقة المستطيلات باللوحة مربك ومتغير كل مرة ببص للوحة. أحيانًا بحس إن المستطيلات السودا ثقب في روح اللوحة نفسها، وأحيانًا تانية بحس إنهم “متلطخين” فوق اللوحة علشان يغطوا ويكتموا حاجة للأبد، الفرشة السودا نفسها فيها عنف وعشوائية.

اللوحة التانية هي Blue, Green and Brown ودي بحبها لأنها بتوضح جانب تاني مبهر في لوحات روثكو وهو انعكاس الخيال. وده أقصد بيه إن اللوحة بتتحول من مجرد رسمة عليها ألوان لشاشة بتعكس خيالات المتلقي بشكل قوي لدرجة إنه يخوف أحيانًا…

Blue, Green, and Brown, Rothko, 1952

يعني اللوحة دي كل ما بركز فيها بسرح في تفاصيل مبهرة عارفة إنها من نسج خيالي بس قدرة روثكو إنه يوفرلي المساحة اللي بينشط فيها الخيال ده بضربات فرشة بسيطة وألوان أبسط بالنسبة لي مبهرة! اللوحة دي بشوف فيها مدينة كاملة بناسها ومبانيها وأحيان تانية بشوف أفق مقبض لمحيط بكل تفاصيله.

اللوحة دي من أخر مجموعة رسمها روثكو واسمها Black on Grey وأعتقد إن لو فيه تمثيل مادي لكلمة “وحدة” مش هنلاقي أنسب منها. برغم بساطتها، اللوحة بتدي إحساس بالعزلة مرعب، وكأن واحد واقف على سطح كوكب لوحده وبيبص للفضاء السرمدي.. ده غير الخيالات المرعبة في الجزء الرمادي من اللوحة.

Black on Grey, Rothko, 1969

اللوحة دي اترسمت سنة 1969 وبعد سنة من تشخيص روثكو بالاكتئاب. سنة 1970 روثكو انتحر وده اللي خلى العديد من النقاد يقولوا إن اللوحة دي بالذات كانت ال suicide statement بتاعته.

أعمال روثكو الأولى كان أسلوبها الرمزي مختلف تمامًا وده واضح في اللوحتين دول: Hierarchical Birds و Gethsemane

Hierarchical Birds, Rothko, 1942
Gethsemane, Rothko, 1944

والمرحلة دي كان روثكو متأثر فيها بالرمزية الأسطورية والأدبية.

وسواء بصينا على أسلوب روثكو في أول أو أخر أعماله فهو في الحالتين كان شايف إن علاقتنا بالفن زي علاقتنا بالأسطورة.. لازم تأثيره علينا يكون نفسي ويكون بيخاطب الغرائز الأولية في الإنسان appeal to primitivism وكأن الهدف هو خلق تجربة نفسية أولية مجردة من التعقيدات والمظاهر.

وأخيرًا روثكو كان شايف إن الفنان والمتلقي لازم يتعاملوا مع الفن زي الأطفال.. الفنان يخليه وسيلة للتعبير عن مشاعره الخاصة ورؤيته الشخصية للأشياء بعيدًا عن مثالية الواقعية وتعقيداتها، والمتلقي يعيش الفن كتجربة بدائية خالصة.

روثكو ساب معظم لوحاته بلا تسمية علشان مايفرضش على المتلقي تفسير معين، معظم التسميات دي وضعت بعد ما مات لتسهيل تصنيف اللوحات.

مارك روثكو هيفضل من فناني الحركة التعبيرية المفضلين عندي وبتأزم جدًا كل ما بحاول أشرح لوحاته لحد لأنها فعلاً مابتتشرحش، هي يا تتحس يا ماتتحسش.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s