كرونوس ونموذج الأب

الأسطورة بتاعتنا النهاردة بتبدأ بأورانوس Uranus وجايا Gaia.. وفقًا للأساطير الإغريقية، أورانوس هو الآله الأول وكان بيتجسد في صورة السماء وجايا زوجته هي الأرض (يُقال إنها كانت الحاجة والدته برضه في نفس الوقت). العداوة بين أورانوس وجايا ظهرت لما أورانوس أبتدى يحس بتهديد من ناحية أولاده اللي كان منهم العملاقة titans والسايكلوبس (المخلوقات اللي بعين واحدة) cyclops وقرر أنه يحبسهم.. فين بقى؟ حبسهم في باطن الأرض، وده معناه إنه رجعهم رحم جايا تاني وده اللي أتسببلها في ألم جسدي ونفسي كبير.

فجايا أتفقت مع أولادها المحبوسين على أورانوس جوزها وفعلا أتلموا عليه كلهم ، وجيه أصغرهم كرونوس Cronus (وفي الأساطير الرومانية كان اسمه Saturn أو زحل) و.. إحم.. أخصاه، وده طبعًا رمز لسلب السلطة منه للأبد. كرونوس هو اللي بقى الكبير بتاعهم من بعده وأتجوز أخته ريا Rhea .. المهم إن والده ووالدته، أورانوس وجايا، قالوله إنه هيلاقي نفس المصير على يد أولاده. فبسبب خوفه من القدر ده وخوفه من تكرار نفس السيناريو اللي حصل مع أورانوس معاه، كرونوس قرر إنه ياكل أولاده!

أيون زي ما قريتوا كده، كان كل ما ريا تجيبله حتة عيل يروح واكله لحد ما ريا فاض بيها وجات عند أخر طفل خلفته (دي عيال تعبت فيها برضه مش ساندوتشات شاورما من أبو حيدر) وبدلته بحجر وهربت الطفل لجزيرة كريت ولفت الحجر في ملاية زي الأطفال وأدته لكرونس اللي أكل الحجر على إنه ابنه بلا أي تمييز ما شاء الله.

الطفل اللي ريا هربته ده هو زيوس Zeus بذات نفسه اللي كبر وقرر ينتقم من أبوه بمساعدة أمه. وفعلاً قدر إنه يهزم كرونوس ويجبره إنه يرجّع أخواته اللي أكلهم (يع!) وحبسه في باطن الأرض هو وبقية العمالقة وطلع هو وأخواته “المتفوفين” لجبل الأوليمب علشان يحكموا.

واضح إنها عيلة زبالة في بعض بس اللي يهمنا فيها هي علاقة الآباء بأولادهم.

وفقًا لعلم النفس، في اللاوعي الجمعي للإنسان فيه حاجة اسمها the father archetype أو النموذج الأصلي للأب واللي بيرمز للقوة الذكورية، الجانب الإيجابي للصورة دي هو القانون والانضباط والحكمة، والسلبي السيطرة والتملك. نموذج الأب ده ممكن يتمثل في صورة إله أو أب أو سلطة سياسية، كل واحد وحسب تجربته ومعتقداته. اللي بيميز نموذج الأب أن على الرغم من كونه مصدر الحياة والسلطة إلا إنه بيبقى خايف من فقدانه للمكانة دي على يد أولاده اللي هم جزء منه وامتداد له.

يعني الشخص أو الشيء اللي بيمثل نموذج الأب بيبقى مشدود بين رغبتين لاواعيتين: الرغبة الأولى هي الامتداد والحفاظ على الامتداد ده لإنه جزء منه وبيدل على استمراريته والرغبة الثانية هي تملك الامتداد والتأكد من عدم خروجه عن نطاق الذات. وبالتالي الابن بيبقى برضه مشدود بين رغبته في الانفصال عن أو تدمير سيطرة الأب وبين الانصياع لسلطته والحفاظ على صورته.

أورانوس في الأسطورة خاف من أولاده لإنهم كانوا مختلفين عنه وده كان تهديد صريح بفقدانه لسلطته. والطريقة الغريبة اللي أتخلص بيها منهم بتدل على رغبته في أنهم يرجعوا لصورتهم الأولى في رحم جايا. كان من السهل عليه أنه يموتهم لكنه أختار حبسهم في باطن الأرض لأن ده بيأكد سلطته عليهم وأنه مصدر وجودهم. الموضوع فكرني بالآباء لما ولادهم يكبروا شوية ويبدأوا يفكروا بدماغ مختلفة فيقعدوا يقولوا “فين أيام ما كنت فسلة صغيرة بتسمع كلامي في كل حاجة!” أو “ده أنا السبب في وجودك يا حيوان!” وهنا بيلعبوا على فكرة بما إنهم مصدر الحياة فليهم الحق إنهم يتحكموا في الحياة دي. وعلشان كده عقاب كرونوس لباباه أورانوس كان إنه أخصاه.. أي أخد منه القدرة الذكورية على منح الحياة، وده أعتى أنواع التمرد على نموذج الأب.

كرونوس بقى كان موقفه أكثر تعقيدًا من أورانوس لأنه كان خاضع لسلطة نموذج الأب وفجأة لقى نفسه هو شخصيًا نموذج الأب، فطبيعي إن الخوف من أن أولاده هيعملوا فيه نفس الحاجة مسيطر عليه وعلشان كده قرر يتخلص منهم بإنه يأكلهم.

ولنا هنا وقفة..

الأكل هنا مش أكل هم النم زي آكلي لحوم البشر، الأكل هنا هو الالتهام بحيث إن المأكول بيتحول لجزء من الآكل، وكأن كرونوس قال لنفسه الطريقة الوحيدة اللي أضمن أن أولادي هيفضلوا بتوعي للأبد هي إني أحتفظ بيهم جوايا داخل النطاق المادي الذاتي بتاعي.. طبعًا دي حاجة في منتهى الأنانية بس بتضمنله الحفاظ على نسله أو امتداده وفي نفس الوقت امتلاكه التام ليهم، والصورة دي على الرغم من بشاعتها إلا إن فيها نوع من الشاعرية علشان بتفكرني بثعبان الأوروبورس The Ouroboros.

The Ouroboros

ثعبان الأوروبورس – اللي بيأكل ديله – في العهود والحضارات القديمة كان رمز للتمام والأبدية.. زي ما الثعبان بيأكل ديله لضمان استمراريته للأبد، كرونوس برضه بيلتهم أولاده لضمان استمراريته للأبد كرمز السلطة المطلقة.

المهم يعني إن نموذج الأب جزء من اللاوعي الجمعي، يعني حتى لو الإنسان مش خاضع للنوع ده من السلطة فبيتم توارثها في الحالة النفسية الجمعية للبني آدمين وبالتالي هتأثر على تصرفاته. وطبعًا خوفه منها واحتياجه لها بتظهر في حياة كل واحد فينا بشكل مختلف ومش شرط في صورة الأب زي ما وضحت مسبقًا.

الأسطورة تم تصويرها في لوحتين متشابهتين لحد ما، الأولى لبيتر بول روبينز Peter Paul Rubens واترسمت سنة 1636 والتانية لفرانشيسكو جويا Francisco Goys واترسمت سنة 1820 تقريبًا.

Saturn, Rubens, 1636
Saturn Devouring His Son, Goya, c. 1820

اللي بيميز اللوحتين دول أنهم بيصوروا عملية التهام كرونوس لأحد أولاده بشكل بشع وحيواني (لوحة جويا بتخوفني فعلاً) على عكس اللي حصل في الأسطورة.. في الأسطورة كان بيبلعهم ودليل على ده أنهم خرجوا عادي لما زيوس أرغم كرونوس إنه يرجعهم! وده اللي خلى كتير من النقاد يقولوا إن روبينز وجويا مكانوش مجرد بيصوروا الأسطورة إنما بيعبروا عن مشاكلهم النفسية الخاصة أو استخدموا الأسطورة والصورة البشعة دي تحديدًا لانتقاد سلطة حكوماتهم. واللي بيأكدلي الكلام ده أكتر إن جويا رسم اللوحة بتاعته في حقبة اللوحات السوداء ودي الفترة اللي أصيب فيها بمرض نفسي واكتئاب شديد وقعد يرسم لوحات في منتهى السوداوية والبشاعة على حيطان بيته.

ملحوظة كمان، خدوا بالكم من تعبيرات وش كرونوس في لوحة جويا.. بتدل على ألم شديد يصل لمرحلة الجنون، ده غير إن الجسد اللي بيلتهمه مش جسد طفل إنما إنسان بالغ. وعلشان كده هتفضل اللوحة دي من أكتر اللوحات كابوسية في تاريخ الفن وعمرنا ما هنفهم جويا كان فعلاً عايز يقولنا إيه من خلالها، بس اللي نجح يعمله إنه قدر يوصلنا معاناته وخوفه الشديد وبشاعة السلطة اللي كان خاضع لها (اللي ممكن تكون مرضه النفسي).

7 تعليقات على “كرونوس ونموذج الأب

  1. تعقيب: لوحات جويا السوداء – هكذا تكلمت لابانشي

  2. تعقيب: بروميثيوس والمعرفة – هكذا تكلمت لابانشي

  3. تعقيب: تانتالوس والنشوة المستحيلة – هكذا تكلمت لابانشي

  4. تعقيب: إيروس وسايكي ونموذج الذات – هكذا تكلم بهنسي

  5. تعقيب: ميتيس والشغف – هكذا تكلم بهنسي

  6. تعقيب: أوديسيوس والسايكلوبس بوليفيموس – هكذا تكلم بهنسي

  7. تعقيب: ربات الانتقام – هكذا تكلم بهنسي

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s