عن العنف النفسي

العنف النفسي emotional abuse من الحاجات اللي بتسيب حفر ومشاكل دائمة في شخصية اللي بيتعرض له. الشخص اللي بيبقى ضحية للعنف النفسي ولفترات طويلة من حياته بيبقى عايش بين رغبتين أقوى من بعض:

رغبته في إنه يبدو للآخرين كشخص “طبيعي” لإنه بيشوف مشكلته دي عار لازم يخبيه بأي شكل (وهقول ليه دلوقتي) ورغبته في إنه يبعد عن أي علاقات إنسانية “طبيعية” علشان مايعيش التجربة تاني.

العنف النفسي بيرسخ داخل الضحية الشعور بالنقص البدني والنفسي والعاطفي والمعرفي.. ومنطقه بيبقى لو كنت شخص قوي وذكي ماكنش ده هيحصلي، فبما إني شخص ناقص على جميع المستويات يبقى أنا أستحق العنف ده، وبكده مشاعر الغضب والكراهية بدل ما بيوجهها للشخص المسيء بيوجهها لنفسه وبيفضل عايش طول حياته بالمنطق ده.. المشكلة فيا أنا. وده اللي بيخلي الضحية بتواجه صعوبات في الدخول في علاقات إنسانية أو في الثقة بالآخرين، مش علشان الناس كلها وحشة، لأ علشان بيخاف يتكشف قدامهم، والناس أحيانًا بترجم هذا التصرف على إنه تعجرف من جانب الضحية.

الخوف عامًة بيبقى مكون أساسي في شخصية الضحية، كل خطوة بياخدها بتبقى رعب وعذاب مقيم لإنه عارف إن أي كلمة أو تصرف غلط (مش شرط من ناحيته) هتأكدله كل البلاوي اللي هو مصدقها عن نفسه و – الألعن كمان – هتيح الفرصة لناس تانية إنهم يمارسوا عليه العنف النفسي..

كل شخص جديد بيقابله هو مشروع محتمل للتحول للشخص صاحب الإساءة الأولى مهما كان الشخص ده كويس.

وبعد تجنب الكثير من الفرص والعلاقات، الضحية بيلاقي نفسه رجع لدايرة العنف النفسي الأول (بقى نوع من الcomfort zone بالنسبة له) وبيستسلم تمامًا للإساءة اللي بيتعرضلها على أيد المُعَنِف وأحيانًا بيتعاطف معاه على أساس إنه الشخص الوحيد اللي مستحمله وبيعرف يتعامل مع شخص مشوه زيه.

حاجة أخيرة، المواجهة مع الشخص المسيء مش على طول بتنفع زي ما الناس متخيلة.. كمية الاستعداد النفسي والقوة اللي بيجمعها الضحية علشان يقوم بالخطوة دي بتخليه أهش من الإزاز، ولو الشخص المسيء رد بقوة مماثلة الضحية بتنهار تمامًا وبتفقد أي قدرة على تكرار التجربة.

العنف النفسي أخطر بكتير من العنف الجسدي لأن العنف الجسدي تأثيره واضح وبيوفر للضحية الدليل المادي الملموس على إنه بيتعرض للإساءة، في حين إن العنف النفسي بيصعب إثباته على الشخص المسيء وبتخلي الضحية عايش في شك دائم إن كل ده ممكن يكون أوهام في دماغه.

الحقيقة بقى اللي الناس مابتحبش تعترف بيها إن فعلاً مفيش حد عنده الرغبة إنه يتعامل أو يدخل في علاقة مع ضحية عنف نفسي.. محدش بيحب شخص ضعيف الخوف مسيطر على كل نفس بياخده لإن الخوف ده بيبقى معدي ومرهق نفسيًا للطرف التاني برضه.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s